XA TEMOS PROTAGONISTAS!

Estes son os nosos Alicia e Coello. 

Como lembraredes, antes de Semana Santa convocamos un concurso para atopar un Coello e unha Alicia cos que ilustrar a nosa versión de Alicia no País das Marabillas. Despois da primeira fase (nas propias aulas de Primaria), na segunda, un xurado constituído por alumnado bibliotecario tomou a sabia decisión de elixir ós protagonistas da nosa historia.

A elección non foi doada, como teredes comprobado. Pero os personaxes seleccionados resultaron moi apropiados, polo orixinal das súas propostas, por respostar ó perfil do personaxe, e por manter un estilo moi acorde entre eles.

As creadoras foron dúas alumnas de 6º B: Sheila e Lucía. Algunha delas quere ser ilustradora. E... como vedes, maña teñen!

Parabéns, chicas!

TERCEIRA PREGUNTA MATEMÁTICA

Seguimos cos triángulos!

Xa está publicado no taboleiro de anuncios a terceira pregunta do noso concurso. 

Cal é a palabra que falta para completar a estrofa...?

Entregade as vosas respostas antes do venres día 1 de abril (non esquezades escribir o voso nome e curso). 

ACERTANTES DA SEGUNDA PREGUNTA MATEMÁTICA

Semella que estes xogos poético - matemáticos gústannnos moito...

... porque o alumnado segue a participar moi entusiasmado. 

Neste enlace podedes lembrar o contido da segunda proposta. A resposta é esta: 

E aquí temos o listado dos acertantes: 

Parabéns, chicos! Xa tendes outros 2 puntos para o voso agasallo de fin de proxecto!

SEGUNDA PREGUNTA DO NOSO CONCURSO MATEMÁTICO

Seguindo cos triángulos...

Despois do éxito de participación na nosa primeira pregunta, continuamos fragmentando o poema A familia do triángulo, escrito por Danny Perich Campana.

E así chegamos á nosa segunda pregunta: 

Canto miden os ángulos do triángulo equilátero?

INVESTIGANDO SOBRE A ATMOSFERA E O CLIMA

En 4º A.

En relación co currículo de Ciencias Sociais, en 4º curso de Primaria trabállanse a atmosfera e o clima. As capas da atmosfera, os climogramas, as isobaras, as medicións... moito teñen que ver co noso PDI Entre liñas anda o xogo. Estes son os algúns dos traballos realizados polo alumnado de 4º A en relación con este tema.

ACERTANTES DA PRIMEIRA PREGUNTA MATEMÁTICA

Gran participación entre o alumnado de 4º B e 6º de Primaria. 

O noso concurso Activa a túa mente está a ter un grande éxito entre o alumnado maior do noso centro. Nun post anterior propoñíamos as dúas preguntas que teñen por respostas: 

Os alumnos e alumnas que acertaron as súas respostas foron: 

Parabéns por participar, chicos! Xa tendes 2 puntos para o agasallo de fin de proxecto!

EXPOSICIÓN ORAL EN EDUCACIÓN INFANTIL

Sobre a Xeometría e os elementos da Arte.

Despois de elaborar o seu traballo sobre a Xeometría, o alumnado de Educación Infantil presentou o seu traballo de xeito oral.

EN BUSCA DE ALICIA E O COELLO

Ilustrando Alicia no País das Marabillas. 

Este ano cúmplense 150 da publicación de Alicia no País das Marabillas. Este é un dos motivos polos que queremos dar relevancia a esta obra co gallo do Día do Libro. Pero hai dous todavía máis poderosos: Lewis Carrol, o seu autor, era matemático, e conqueríu crear unha obra na que a lóxica (ou a ilóxica) e as matemáticas están permanentemente presentes. Que mellor obra, pois, para traballar, cando o noso PDI titúlase Entre liñas anda o xogo?

Dende hai uns meses, cada aula ten encomendado un capítulo ou fragmento para contar empregando a app Explain Everything. Sen cortar a creatividade do alumnado, compría dar unidade ós personaxes principais: Alicia e o Coello Branco. Por tal motivo, convocamos un concurso de ilustración que se desenvolveu en dúas fases: cada aula elixía (entre as producións dos membros do grupo) as ilustracións que a representaban; nunha segunda fase, un selecto xurado (constituído por alumnado bibliotecario) decidíu os gañadores.

Postos a buscar, atopamos, ó longo da historia, moitísimos ilustradores que abordaron ambos os dous personaxes. Así, atopamos con Alicias rubias, morenas, de pelo curto, longo, vestidas de azul ou non... O caso é que Lewis Carrol en ningún intre describe a Alicia. Sen embargo, semella que a nosa idea de Alicia que todos temos na mente é a que difundíu Disney.

Coa intención de non coartar a creatividade do alumnado e evitar as influencias, o Equipo de Biblioteca decidíu propor ilustrar un personaxe (sen nome) con estas características (que son as que nos proporciona a lectura da novela):

• Unha nena
• Curiosa
• Aventureira
• Un pouco contestona e resabiada
• Non ten medo a nada
• Emprega a cabeza para pensar
• Loita contra as inxustizas
• Mete a pata falando
• Imaxinativa
• Soñadora

E estes foron as aportacións do noso alumnado de Primaria: 

Ilustrar ó Coello Branco resultou moito máis doado de propor, xa que o propio Lewis Carrol nos da a súa descrición:

• Coello branco
• Ollos rosados
• Fala
• Viste un chaleque
• No bolsillo do chaleque leva un reloxo

E estas foron as ilustracións que chegaron ó noso concurso.

Vaia ilustradores tan bos e creativos que temos no cole...!

XOGANDO Á XEOMETRÍA CON ARTE

En Educación Infantil.

Durante estes meses a rapazada de Educación Infantil estivo a investigar e a experimentar coa xeometría da man dun personaxe de ficción: Arte. Este é o resultado do seu traballo:

EXPOSICIÓN ORAL EN 2º A

Sobre o calendario azteca.

Despois de elaborar o seu traballo escrito, o alumnado de 2º A mostrou o seu traballo a un público selecto: os nenos e nenas de 1º A.

Un gran traballo. Parabéns, chicos e profe!

OS AZTECAS

O traballo da aula de 2º A.

Este curso, o noso PDI titúlase Entre liñas anda o xogo. Un bonito título para uns contidos moi amplos. Así, os círculos e a medida do tempo levaron ó alumnado de 2º A a investigar sobre os aztecas. Este é o traballo que teñen redactado.

Parabéns, chicos!

UNHA EXPOSICIÓN PARA TODA A FAMILIA

No Centro Cultural A Fundación. 

Hai un par de semanas, nun deses fins de semanas chuviosos que tanto se teñen prodigado este inverno, tiven ocasión de visitar a exposición Heroes animados no Centro Cultural A Fundación. O local fervía de familias con rapazada ben cativa. E non era para menos. A mostra, interactiva, ofrecía o paso a paso da creación de grandes filmes de debuxos animados, coma O príncipe de Exipto ou Madagascar.

Por si estes días de Semana Santa tendes tempo e ocasión, achégovos o enlace coa información (a mostra clausúrase o 16 de abril). Un bo xeito de culturizarse e multialfabetizarse en familia.

21 de MARZO

Día da Poesía

Aínda que este curso o Día da Poesía coincide durante as vacacións de Semana Santa, nós non nos esquecimos del. Ó contrario: témoslle dado a relevancia que require, adicando non un día, senón todo o mes á poesía. Así, durante as Horas de Ler de marzo escoitamos pola megafonía os Poemas matemáticos gravados por varios alumnos e alumnas bibliotecarios.

E para suliñar esta data, que coincide co comezo da primavera, temos organizado un Concurso de recitado. A participación foi voluntaria, e soamente tivo unha condición: que o poema elixido pertencera ó poemario Os soños na gaiola, de Manuel María, poeta homenaxado este ano no Día das Letras Galegas.

A continuación deixámosvos os vídeos do alumnado participante. Están organizados en dúas modalidades: recitacións individuais e recitacións colectivas. Á volta de Semana Santa, un xurado nomeado ó efecto outorgará os premios correspondentes.

Parabéns, chicos, pola vosa participación!

HACHIKO EN CUNTIS

A nova elixida polo alumnado de 2º B.

O grupo de 2º B de Primaria foi o encargado de repasar, esta semana, a prensa diaria. Entre as novas seleccionadas elixiron a historia dun can abandonado en Cuntis.

Parabéns, chicos!

SOMOS UNS ARTISTAS..

... e vimos de París!

No seu Venres de Viva Voz, os nenos e nenas de Educación Infantil 4 anos B cántannos esta divertida canción.

Pois si que son uns artistazos... E que ben cantan!

COMPARTINDO LECTURAS...

... con Ledicia Costas. 

Hai unha semana tivemos a sorte de ter a Ledicia Costas no noso colexio, compartindo a lectura da súa obra Escarlatina, a cociñeira defunta co alumnado de 4º e 5º de Primaria. E non podía haber mellor cronista que un dos oíntes: Juan Carlos, de 5º B fai unha espléndida narración do vivido durante esa hora que se fixo moi, moi curta.

O 9 de marzo foi un día moi emocionante para nós, porque recibimos a visita no noso colexio de Ledicia Costas. Sabedes quen é? Pois é a escritora do libro Escarlatina, a cociñeira defunta. Se non o lestes, recoméndovolo. 

Durante o intre que estivo connosco, contounos moitas cousas: en que se baseou para a creación de cada un dos personaxes, anécdotas, etc. Explicounos que para o personaxe de Román baseouse nela de pequena, que era moi traste; para Amanito pensou nos caciques dos de antes... Tamén incorporou na historia un avión da Segunda Guerra Mundial, porque lle apaixonan. As receitas que aparecen no libro son da súa irmá, porque dixo que ela non era moi boa cociñeira. E contounos moitas anécdotas de gatos. A que máis nos gustou foi a de que fixeron un pavo e cando o estaban abrindo atopáronse a un hamster no interior comendo os froitos secos. 

Gustáronlle moito as fotos que tiñamos na clase dalgúns compañeiros facendo as receitas do libro. 

A profesora Ana explicoulle que estabamos utilizando o libro na aula para facer unha morea de exercicios: ditados, descricións, debuxos... a Ledicia gustoulle a idea. 

Sabedes? É mellor que non vos conte nada máis. Collede o libro e lédeo. É FANTÁSTICOOOO!!!!

Xa se me esquecía o mellor de todo: que nos asinou os libros e púxonos unha bonita dedicatoria. 

E, por último, deixámosvos coa dedicatoria que Ledicia deixou no noso libro de visitas. Non a puxemos o revés, non...! Así a escribíu a autora: dende o inframundo!

Grazas, Ledicia!

E grazas, Juan Carlos, por unha crónica tan completa!

MATEMÁTICAS NA ROTONDA DA RÚA CORUÑA

Con Alba, Frianciño e a súa familia. 

A semana pasada, Frianciño estivo na casa de Alba (3 anos). O seu pai, Roberto, envíanos a crónica das súas andanzas:

Esta semana Alba O., de 3 anos infantil, tivo a sorte de recibir a Frianciño.

Tal foi a alegría que decidíu ir de paseo con el, e o primeiro que atopou foi o mundo matemático e triangular dos guindastres na zona de Barreras, en Vigo.  Xusto ó lado, unha  preciosa serie  de cilindros que forman una pérgola. E para rematar a tarde, levouno xogar un pouco a unha casa tamén moi matemática.

Saúdos.

Moitas grazas, familia, por esta crónica tan detallada e completa. Frianciño quedou encantado. 

SONETO GASTRONÓMICO - NUMÉRICO

Un poema matemático. 

Alba e Vega, alumnas de 5º A, recitan este Soneto gastronómico - numérico escrito por Antonio Box Finis.

FRIANCIÑO COÑECE O PARQUE DA RIOUXA

Con Zoe, de 1º B. 

A fin de semana pasada Frianciño marchou para casa de Zoe. E xuntos foron visitar un precioso parque ubicado no noso barrio de Teis: o parque da Riouxa. Se vos fixades como Zoe e a súa familia atoparedes un montón de elementos matemáticos. Aquí está o que nos conta a súa nai:

De paseo no parque da Riouxa o vernes 11 de marzo, Zoe e Frianciño atopáronse co primeiro elemento xeométrico: un cadrado que, xunto cuns cantos cadradiños máis acompañados dalgúns rectángulos forman o paseo que nos baixa á zona preferida de Zoe: o parque infantil.

Ademais atopáronse cunhas fontes tamén rectangulares, un par de filas de árboles moi ben colocadiños e un dos elementos máis característicos da Riouxa, a gran circunferencia que nos atopamos o fondo.

Esperamos vos gusten as fotos. Unha aperta moi grande. 

Pois claro que nos gustan as fotos! Un parque tan fermoso... e que pouco o coñecemos! Frianciño quedou abraiado co descubrimento. 

Moitas grazas, familia! 

A DIVINA PROPORCIÓN

Poema de Rafael Alberti.

Vega, alumna de 5º A, recita este poema de Rafael Alberti.

MULLERES ENTRE LIÑAS

Para celebrar o Día da Muller Traballadora. 

O pasado día 8 de marzo celebramos no colexio o Dia da Muller Traballadora. Foi unha xornada de descubrimento, de aprendizaxe, de traballo cooperativo e, por que non, tamén de diversión, xa que todos estes compoñentes se mesturaban no deseño da actividade.

Xa que o noso PDI deste curso se titula Entre liñas anda o xogo, a idea foi investigar sobre mulleres vencelladas, dalgún xeito, cos contidos do proxecto: matemáticas, pintoras, mulleres que percorreron grandes distancias (aviadoras, viaxeiras, astronautas), científicas, bibliotecarias e modistas.

Así pois, cada aula recibíu o encargo de investigar sobre:

• Educación Infantil: Frida Kahlo
• 1º A: Ada Byron
• 1º B: María Moliner
• 2º A: Menchu Lamas
• 2º B: Mª Josefa Wonenburger
• 3º A: Valentina Tereshkova
• 3º B:  Hipatia de Alexandría
• 4º A: Egeria
• 4º B: Florence Nightingale
• 5º A: Amelia Earthart
• 5º B: Hedy Lamarr
• 6º A: Coco Chanel
• 6º B: Tamara de Lempicka

Unha vez localizada a información, esta debía organizarse nos seguintes puntos: 

• Quen era?
• Onde vivíu?
• A lenda
• O seu legado
• Lembra

E resumila ata podela ler nun máximo de 90 segundos. 

Con todos estos elementos, por grupos, e empregando a app Tellagami, os alumnos de cada aula crearon os seus propios avatares e leron a información recabada. Coas seguintes imaxes poderedes comprobar como disfrutaron os rapaces traballando por grupos.

Cada aula creou varios tellagami. Sen embargo, aquí ofrecemos só unha mostra para coñecer a cada unha das nosas protagonistas.

COCO CHANEL

Unha vida entre liñas e patróns. 

Coco Chanel, unha muller senlleira no campo da moda, pasou a súa vida entre teas, tesoiras e patróns. O alumnado de 6º A cóntanos a súa vida empregando a app Tellagami.

Imaxe: THE COINCIDENTAL DANDY. Portrait of Coco Chanel by Boris Lipnitzki. En Flickr. Dominio público. 

ADA BYRON

Filla de poeta e famosa matemática. 

Ada Byron, condesa de Lovelace, foi filla do famoso poeta británico Lord Byron, aínda que ela destacou como matemática, nunha época na que non estaba ben visto que as mulleres se adicaran a estas tarefas.

O alumnado de 1º A fálanos sobre a vida de Ada Byron empregando Tellagami.

Imaxe: Alfred Edward Chalon. Ada King, condesa de Lovelace. En Wikimedia Commons. Dominio público. 

UN, DOS, TRES

Unha pequena xoia firmada por Rafael Alberti.

Silvia, alumna de 5º A recítanos esta miniatura de Rafael Alberti.

TAMARA DE LEMPICKA

Unha pintora enigmática. 

O alumnado de 6º A investigou sobre esta enigmática polaca que é un icono da pintura art déco. O resultado da súa investigación preséntano empregando a app Tellagami.

Imaxe: RENAUD CAMUS. Le Jour ni l’Heure 6490 : Tamara de Lempicka. En Flickr.  CC BY. 

MENCHU LAMAS

Unha pintora viguesa e actual. 

O alumnado de 2º A estudiou, para o Día da Muller Traballadora, a figura da artista viguesa Menchu Lamas. Unha pintora á que lle gusta moito traballar coas formas xeométricas que se forman... cando xogamos entre liñas!

Imaxe: FRIANCIÑO. Os siameses do círculo, obra de Menchu Lamas. 

RÓMPESE O PERITO MORENO

Bombazo informativo.

O glaciar Perito Moreno rompeuse o pasado venres. Esta nova impresionou ó alumnado de 3º B, que adicou o programa de radio semanal a analizar esta nova.

Parabéns, chicos!

MARÍA JOSEFA WONENBURGER

Unha matemática galega.

Probablemente, nunca na nosa vida tiveramos escoitado falar desta matemática galega que, sen embargo, foi coñecida a nivel mundial, entre outros, polas súas aportacións no cubo de Rubick. O alumnado de 2º B desenvolveu un traballo magnífico para informarse sobre esta muller e dala a coñecer.

Tras ler un texto preparado por Feli, a súa mestra, resumiron a súa biografía a partir de preguntas relacionadas coa comprensión lectora.

E logo difundiron a súa vida empregando Tellagami. 

Imaxe: NEMIGO. Homenaxe a María Wonenburger no parque de Santa Margarida, na Coruña. En Wikipedia. Dominio público. 

A VIAXE DE EGERIA

A primeira peregrina da historia.

Esta muller da Gallaecia, alá polo século IV, emprendeu unha longa viaxe, soa, ata chegar a Terra Santa. Unha liña de moitos kilómetros que reflectíu tamén entre as liñas do seu libro, Itinerarium ad Loca Sancta, a primeira guía de viaxes coñecida. Unha aventureira para lembrar co gallo do Día da Muller Traballadora. Os rapaces e rapazas de 4º A cóntannos a súa historia.

Imaxe: Portada dunha tradución ó inglés da Viaxe de Eteria publicado en 1919. En Wikipedia. Dominio Público. 

A VIDA DE HEDY LAMARR

Co alumnado de 5º B. 

Os rapaces e rapazas de 5º B investigaron sobre Hedy Lamarr, quen, ademais de actriz, foi a precursora da actual wifi. Unha figura senlleira para lle adicar o Día da Muller Traballadora.

Imaxe: Publicity photo of Lamarr in 1940. En Wikipedia. Dominio público. 

A VIDA DE AMELIA EARHART

Contada polo alumnado de 5º A.

O alumnado de 5º A está a traballar sobre as coordenadas xeográficas. Que mellor que aproveitar a figura de Amelia Earhart, a primeira muller aviadora, para celebrar o Día da Muller Traballadora!

Imaxe: Amelia Earhart w kabinie swojego samolotu w 1937. En Wikimedia Commons. Dominio público. 

MARÍA MOLINER

A súa biografía.

Este ano cúmplense 50 anos da publicación do dicionario de María Moliner. Os nenos e nenas de 1º B cóntannos a súa vida empregando a app Tellagami.

Imaxe: By Biblioteca de la Universidad de Zaragoza. Biblioteca María Moliner. En Wikimedia Commons. CC BY-SA 2.0 

OS NENOS E NENAS DE INFANTIL CONTAN A VIDA DE...

Frida Kahlo.

Xa que están a investigar sobre a pintura, os nenos e nenas de Educación Infantil elixiron traballar a biografía de Frida Kahlo para conmemorar o Día da Muller Traballadora. Para facelo, empregaron a app Tellagami.

Imaxe: CEA+. Frida Kahlo - Self portrait with Thorn Necklace and Hummingbird. En Flickr. CC BY.

A FAMILIA DO TRIÁNGULO

Un fantástico poema matemático. 

Ainara, alumna de 6º A, recita este poema de Danny Perich Campana que constitúe unha auténtica clase de xeometría.

XEOMETRÍA NA ESTACIÓN

Con Mario e Frianciño. 

A pasada semana Frianciño marchou a casa de Mario (6º A). Xuntos, achegáronse á estación de RENFE, en Guixar. Non vos decatárades nunca da súa forma rectangular, que se repite nas alegres cores da fachada?

Pois convidámosvos a que, se non a coñecedes, deades un paseo polo Areal e disfrutedes. 

Grazas, familia!

ACTIVA A TÚA MENTE

Un reto semanal para o noso alumnado. 

Comezamos hoxe unha actividade que pretende ser semanal e que ten como obxectivo estimular o pensamento e a participación do noso alumnado. Para iso temos instalado no corridor de Primaria un panel informativo e unha urna para introducir as respostas.

As primeiras propostas terán como punto de partida un poema titulado A familia do triángulo, escrito por Danny Perich Campana.

Estas son as PREGUNTAS desta semana: 

• Indica o nome de catro polígonos regulares. 
• Debuxa un triángulo e indica os seus elementos principais.

O PRAZO remata o venres 11 de marzo. 

Participa e gaña puntos para obter a túa baralla de familias matemáticas!