REFUXIADOS

Os números da traxedia.

Dende hai meses, as novas sobre a guerra en Siria e os refuxiados acompáñannos diariamente na prensa. Pero esta traxedia xa dura máis de catro anos, e se está a converter na maior crise humanitaria da historia. ACNUR, que está realizando unha labor encomiable nos campos de refuxiados, difunde vídeos coma este coa intención de sensibilizar á poboación e facernos conscientes da inhumana situación que vive o pobo sirio.

Pero... que é un refuxiado?

A Convención de Xenebra sobre o Estatuto dos Refuxiados indica que un refuxiado é unha persoa que por temor a ser perseguida por causa da súa raza, relixión, nacionalidade, pertenza a un grupo social ou polas súas opinións políticas, está fóra do seu país e non quere (ou non pode) acollerse á protección deste.

Que diferenza hai entre un refuxiado e un migrante económico?

A diferenza dos migrantes económicos, os refuxiados non abandonan o seu país de forma voluntaria. E seu obxectivo non é mellorar a súa situación económica no país que lles proporciona cobixo, senón acadar unha meirande seguridade.

Que dereitos ten un refuxiado?

Un refuxiado ten dereito a asilo en condicións de seguridade. A seguridade inclúe:

• seguridade física;
• liberdade de pensamento;
• liberdade de movemento;
• dereito a que se lle respecte como persoa;
• dereito á asistencia médica;
• dereito ó traballo;
• dereito á escolarización.

Sen embargo, cando existe unha grande afluencia de refuxiados, os países de asilo poden restrinxir algúns dereitos, como o de movemento, o de traballo e o de escolarización. 

Preme na seguinte imaxe e escoitarás as palabras deste neno sirio refuxiado en Europa. Como fala en inglés, poderás entender moito mellor o que expresa se les a tradución debaixo. 

Reflexionemos para celebrar o Día da Paz

O vindeiro 30 de xaneiro celebraremos o Día Escolar pola Paz e a non violencia. A través da lectura de gráficos intentaremos achegarnos ó drama que vive a poboación siria, e á resposta que a Unión Europea está dando ás súas necesidades. Estas son as nosas suxestións por niveis:

• 1º curso de Primaria: Repartindo refuxiados

• 2º curso de Primaria: Refuxiados + migrantes

• 3º curso de Primaria: + Refuxiados - Presión

• 4º curso de Primaria: Refuxiados + desprazados

• 5º curso de Primaria: Enorme incremento... de fuxidas e peticións de asilo

• 6º curso de Primaria: Pedindo asilo... nos países da Unión Europea

Imaxe: IRISH DEFENCE FORCES. Le Eithne Operation Triton. Licenciado sob CC BY 2.0, via Wikimedia Commons.