CELEBRANDO O DÍA DA PAZ

Despois de estar preparándoo durante máis de quince días, por fin chegou o Día da Paz.

Resultou unha festa alegre, vistosa e entrañable, na que as pombas da Paz sobrevoaron as nosas cabezas en forma de globo de cor branco.

Despois de lembrar o motivo que nos reunía no patio coas nosas familias, varios alumnos e alumnas do Segundo Ciclo recitaron poemas alegóricos (mesmo un rap inventado por eles). Mentras os rapaces de 6º de Primaria preparaban a súa intervención (cantando What wonderful word) aproveitamos para lanzar vivas a favor da paz.

Rematamos este sinxelo acto cantando a nosa canción para o Día da Paz: Cantarei, cantarás.

A continuación tendes a reportaxe fotográfica elaborada pola profe Luz.

E aquí, "a pé de pista", as impresións da reporteira Montse.

Botádelle tamén unha ollada á marabillosa decoración na que participou todo o alumnado e o proferado.

Grazas a todos e a todas por participar con tanto entusiasmo. 

SEMENTANDO PAZ

Dende a volta de Nadal, no cole estivemos de sementeira.

E hoxe "respirábase" Paz por todos os recunchos. Decenas de sementes agromando e cantando á paz. E un mural colectivo coordinado por María, a nosa Orientadora.

Disfrutade destas artísticas visións!

EN DEFENSA DO LIBRO E DA LECTURA

Das miñas clases de Literatura de COU lembro tres cousas. 

O "ladrillo" do libro de texto de Anaya, onde estaban condensados todos os grandes nomes da literatura universal contemporánea, todos os que eran alguén por ter influído noutros alguén. Tan exhaustivo, que todo quedaba na teoría, e apenas nos daba tempo a disfrutar da lectura de tres novelas.

A lectura de Tiempo de silencio, todo un descubrimento. Un libro duro pero que disfrutei lendo e relendo (xa sei que moita xente, precisamente, rompeu a súa promesa de rematar todo libro que comezara lendo este título).

Por último, unha frase do meu profesor: Lede, lede moito: ler faravos libres. 

Recentemente, a través da rolda de correo do PLAMBE recibimos unha invitación da coordinadora da Biblioteca Escolar Víctor Sáenz convidándonos a ler o artigo de Juan Cruz publicado en El País e que leva por título Conspiración contra el libro. Cando leo ó final do mesmo esta afirmación que resume o sentir da xente (ler, ó fin e ó cabo, non é tan sustancial para vivir... e ademais é caro) non podo deixar de lembrar aquela frase do meu vello profesor. Que se pode esperar dunha sociedade na que sobran a desesperanza e o pesimismo e faltan as preguntas...?

Convídovos a consultar este artigo, a ler, e a seguir sendo libres. 

Conspiración contra el libro

A LENDA DO ESPANTALLO

Un precioso curto de animación co que nos ten agasallado a profe Luz.

Agora que se achega o Día da Paz, e este curso, no que traballamos sobre o PDI A lingua sabe a pan, este curto vennos como "anel ó dedo".

Unha fermosísima historia na que se fala de soidade, de temor ó que é diferente, do poder malévolo das afirmacións infundadas, da intolerancia, pero tamén de xenerosidade, gratuidade e amistade. Real como a vida mesma!

O director é Marco Besas, e está narrado polo actor Sancho Gracia, recentemente falecido.

Que o disfrutedes e vos faga pensar!

E PARA TI, QUE É A PAZ

Pensa e cóntanolo. 

A profe Luz, "navegando pola Internet", atopou unhas frases sobre a paz escritas por alumnos e alumnas estadounidenses e australianos. Algunhas son moi fermosas:

A paz é un crebacabezas esperando ser resolto. 

A paz é unha historia que espera ser contada. 

A paz é a calidez nunha terra chea de frío. 

E para ti, que é a paz...?

Pénsao e cóntanolo. Escribe a túa resposta no seguinte formulario. Coma os profes daqueles rapaces, publicaremos as mellores respostas.

UNHA FIN DE SEMANA CON FINA NOS BLOGUES DO PLAMBE

Co gallo do seu nomeamento como catedrática da Real Academia Galega.

Como vos comentabamos nun post anterior, a instancias da Asesoría de Bibliotecas Escolares, nos blogues das bibliotecas que conforman o PLAMBE figurou esta fin de semana a nova do nomeamento de Fina Casalderrey como catedrática da RAG.

Grazas ó esforzo e á paciencia de Isa Vázquez (a coordinadora do Equipo de Biblioteca do C.E.I.P. Quintela - Moaña) temos todas as novas recollidas neste álbum de Picassa.

Por outra banda, en días pasados escribimos un e-mail a Fina Casalderrey dándolle os parabéns en nome dos nosos alumnos. E temos recibido unha rápida resposta: 

Moitas grazas por esas palabras de agarimo, Mónica.
Apertas coma pontes romanas para todas, para todos vós.

Fina

Pois moitas grazas a Fina e a Isa por nos facer a vida máis doada e máis fermosa. 

UNHA ESCRITORA DE L.I.X. NA ACADEMIA

Reproducimos a nova tal e como a publica en RedeLibros a Asesoría de Bibliotecas Escolares. 

A RAG (Real Academia Galega) acaba de elixir a Fina Casalderrey como académica numeraria. 

Con Fina entra na Academia unha muller (por méritos propios) pero tamén a literatura infantil e xuvenil. Diso vai tratar o seu discurso de entrada,  escoitaremos esas palabras que tratan desta literatura non sempre asumida como LITERATURA (con maiúsculas).

Realmente estamos de noraboa, pois sentímonos moi ben representadas por esta muller que entre outros conta con Premio Nacional de Literatura Infantil e Xuvenil. Unha muller que ademais é mestra (¿acaso se deixa de ser por non ir xa á escola?) e, polo tanto, mediadora do libro. Unha académica de luxo!

CUNQUIÑA SEGUE A ESCRIBIR SOBRE O ENTROIDO

Os nenos e nenas de Infantil teñen recibido unha nova carta de Cunquiña.

E, nesta ocasión, propónlles este LIM elaborado polo profesorado do CRA Raíña Aragonta:

Aquí tendes a carta na que Cunquiña vos anima a realizar este LIM:

¡DETENTE, ELEFANTE!

O contacontos desta semana.

As protagonistas foron Thoa (Educación Infantil 3 anos A) e Rosa, a súa nai, que nos contaron con marionetas de dedos este fantástico conto no que todos os animais da sabana intentan evitar que o elefante se meta na charca, para evitar o seu desbordamento.

Despois do conto, obradoiro: os participantes fixeron as súas propias marionetas. Mágoa que, por mór da mala climatoloxía, nesta ocasión o público foi escaso.

Un grazas moi grande para Rosa e Thoa, e para todas as persoas que (sabémolo) contribuíron desinteresadamente para facer unha actividade bonita e vistosa. 

NACEN DOUS NOVOS CLUBES DE LECTURA

Nas aulas de 5º curso de Primaria.

O pasado martes día 22 reunímonos na Biblioteca cos alumnos e alumnas que, voluntariamente, decidiron participar nesta actividade. En total, vinte rapaces e rapazas que, entre doces lambetadas, decidiron pór nome ós seus clubes de lectura:

• Os libros molan
• Os lectores de Frian

Agora xa están entusiasmados, lendo con fervor os seus respectivos libros: Os megatoxos e  aprendiz de druída e Tanis I o Mocos. 

A próxima cita: o 28 de febreiro (Os lectores do Frian) e o 7 de marzo (Os libros molan).

Boas e fructíferas lecturas!

NOVEMBRO DE MEDO (AÍNDA QUE EN XANEIRO)

Novembro: mes de Santas Compañas, Sacaúntos, Homes do Saco, Lobishomes, Cocones, Papones...

O alumnado do Segundo Ciclo de Primaria elaborou estes traballos.

AGRADECEMENTO DE CUNQUIÑA

Por colaborar contándonos refráns. 

Cunquiña quere agradecerlles ós nenos e nenas de Frian (e tamén ás súas familias) por contarlle un montón de refráns do mes de novembro. 

Grazas a todos vós, Cunquiña, pouco a pouco, vaise enchendo e recuperando a súa memoria. 

A continuación podedes ler esta recompilación tan grande que temos feito entre todos. 

Grazas, Frian!

LEMBRANDO NOVEMBRO (AÍNDA QUE SEXA XANEIRO)

Novembro: mes de castañas, de matanza e de refráns.

Por iso, daquela, pedíramos ó alumnado do Primeiro Ciclo de Primaria que investigara sobre un refrán. E aquí tendes o resultado do seu traballo.

Parabéns!

NEVA, NEVA NA CASA DE HELENA

O frío e a neve chegaron con toda a súa intensidade. 

E a conta diso, na casa, esta noite, xurdiu un sinónimo de nevar. Non existe no dicionario, pero, sen dúbida, é un localismo. Cando miña nai era cativa, dicíase está follacando.

Coñecedes vós outros sinónimos...? No dicionario da Real Academia Galega (RAG) aparecen estoutros: falopar, farrapear, felepar, folerpar, mantelear.

CUNQUIÑA VOLTA ESCRIBIR ÓS NENOS DE INFANTIL

E di que chega o Entroido.

Cunquiña non para. Iso de estar tan preto de Cunqueiro debe de tela inspirado. Por iso nos achega unha nova carta con sorpresa:

• infórmanos de que chega o Entroido; 
• pídenos que a axudemos a elixir disfraz; 
• selecciona na Biblioteca uns libros para ler. 

Aquí vos deixamos todo. Haberá que se pór a traballar...!

REFRÁNS PARA O ANO

Primeiro Venres de Viva Voz do ano.

Os encargados foron os alumnos e alumnas de 2º A. Elixiron un tema moi vencellado ó noso PDI (A lingua sabe a pan): o recitado dalgúns refráns tradicionais relacionados cos meses do ano.

Mirade que ben o fan, e... aprendede os refráns que non coñezades!

PROTEXENDO ANIMAIS

Cans e gatos convivindo. 

Esta é a nova que teñen hoxe presentado os alumnos e alumnas de 2º B de Primaria. (Premede na foto para ollar máis polo miúdo o seu contido). 

Ademais, hoxe temos estreado o magnífico mural adicado á Nova da Semana. Se vos fixades, poderedes descubrir a sabia man de dúas das "creativas" do cole: as profes Luz e Montse. 

O VERME QUE FOI BOLBORETA

Novos protagonistas nas Tardes de Conto.

Pouco a pouco, máis pais e nais vanse sumando ás familias contadoras de contos. Nesta ocasión tocoulle o turno a Charo, a nai de Adrián (Educación Infantil 3 anos B), quen nos contou o conto titulado El gusanito.

Din "as malas linguas" que todo resultou fantástico, e que o obradoiro de bolboretas que houbo a continuación foi moi vistoso.

Deixámosvos coas imaxes desta fantástica xornada.

Grazas a Adrián e a Charo pola súa colaboración! E grazas ós "escoitadores", por seguir a actividade semana a semana!

PREPARANDO O DÍA DA PAZ

Con sabor a lingua e a pan.

Durante este Nadal, sorprendeunos a nova da destrución do patrimonio que está a ter lugar en Mali. Alí, na histórica cidade de Tombuctú, hai medio ano que grupos islamistas e radicais están atentando contra o patrimonio cultural desta cidade. Os expertos estiman que están en perigo dezaseis mausoleos e miles de escritos preislámicos que non só falan do Islam, senon tamén de astronomía, música, anatomía e botánica, e que, polo tanto, son tesouros da sabedoría.

Así pois, tras o golpe de estado do 22 de marzo de 2012, Mali debilítase e perde os seus sinais de identidade.

A comunidade internacional tense pronunciado sobre estes actos. Entre eles destacamos:

• o Ministerio de Asuntos Exteriores español calificounos como crímenes contra o patrimonio cultural de Mali. Ademais, afirma que "atentan de xeito irreversible contra a historia e a memoria dun pobo"; 
• o Goberno dos Estados Unidos condenou rotundamente a destrución do patrimonio da Humanidade; 
• a Unesco incluíu a Mali e a algunhas das súas xoias arquitectónicas no listado de Patrimonio da Humanidade en Perigo.

Neste enlace da Unesco podemos coñecer algo da cidade de Tombuctú. 

Atentar contra o Patrimonio da Humanidade é atentar contra as persoas. É unha actitude violenta que vai en contra dos Dereitos dos Nenos, e, polo tanto, dos Homes: todos temos dereito a coñecer a nosa cultura e a participar activamente nela. 

E... que pasa cando eses atentados se cometen contra a lingua, calquera que esta sexa...? Non é a lingua un Patrimonio Inmaterial da Humanidade...?

O noso Proxecto Documental Integrado deste curso (A Lingua sabe a Pan) estanos a sensibilizar moito sobre este tema, e sobre a responsabilidade que temos na defensa do que é noso e nos identifica como pobo. Por iso, a nosa Canción para o Día da Paz é un canto á nosa lingua. Está inspirada naquela canción que xurdiu entre os cantantes hispanos como resposta ó famoso We are the world: Cantaré, cantarás. Esperamos que vos guste e que a cantedes connosco.

Para vos axudar, deixámosvos aquí a letra. 

Feliz (e falador) Día da Paz. 

UNHA TARDE DE CONTO INTERNACIONAL

Nas Tardes de Conto da semana pasada estiveron connosco Mati e Tato. 

Mati e Tato son os tíos italianos de Noa (1º de Primaria) e Aroa (Infantil 4 anos). Tato naceu no Sur de Italia, e Mati en España. Pero ambos os dous viven agora na cidade italiana de Parma. Despois de pasar o Nadal en España coa súa familia, visitaron a nosa Biblioteca antes de voltar ó país da Bota. E que mellor que contándonos a historia de Befana, esa bruxa italiana que leva os agasallos ós nenos italianos o día 6 de xaneiro, en lugar dos Reis Magos?

Despois do conto, estivemos "parlando italiano", xa que nos aprenderon os números, as cores e os nomes dos membros da familia. 

E tras "parlare", "facere". Todos os participantes estivemos a pintar os números cos seus nomes en italiano. 

Moitas grazas a Noa, a Aroa (e ós seus pais, por teres a magnífica idea de nos traer esta sorpresa), e, por suposto, a Mati e a Tato. 

ACHÉGASE O ENTROIDO

E no noso cole xa empezamos a prepararnos.

En relación co noso Proxecto Documental Integrado sobre a Tradición Oral (A lingua sabe a pan) queremos coñecer e vivir "en primeira persoa" o ciclo do Entroido.

Este pequena presentación sobre o Domingo Fareleiro servirá para orientar o traballo do alumnado do Primeiro Ciclo de Primaria.

NACE GALAXIA TALES

Unha páxina de contos interactivos para leres dende calquera dispositivo.

Están dispoñibles en inglés, galego e castelán, e poden mercarse nesta mesma páxina. E, antes de facelo, podemos disfrutar dun 20% do seu contido na propia web.

As primeiras lecturas son: Unha sorpresa para Goruk, de Javier Landesa, e Así comezaron as aventuras da Rosa dos Ventos e Xan Pericán, de Joel Franz Rosell. Cunhas preciosas ilustracións, respectivamente, de María Longa e Luis Castro Enjamio, e a voz da polifacética Teresa Santamaría.

Premede nos títulos e disfrutade do comezo destas fantásticas historias.

O LAR DE FRIANCIÑO REMATOU O ANO NO BLOG DE BIBLIOTECAS ESCOLARES

E por triplicado. 

Algunhas das nosas propostas durante o pasado mes de decembro tiveron eco na web de Bibliotecas Escolares de Galicia:

• As nosas Recomendacións de Lectura.

• O noso traballo navideño Pans doces do Nadal. 

Ademais, tamén foi nova no blog Hora de Ler a nosa iniciativa titulada Adoptando libros polo Nadal. 

Parabéns para todos os que fixeron posibles estas actividades.