E, tal como tiñamos programado, todo o alumnado e profesorado do Centro reuníuse no patio para lembrar e recitar a Celso Emilio.
A pesar da premura de tempo, todo o mundo acometeu con entusiasmo a súa tarefa: os rapaces e rapazas que nos dirixiron a todos na lectura; o profesorado que ensaiou Deitado frente ao mar co seu alumnado, os que buscaron distintos vídeos sobre Celso Emilio e a súa obra, ou os que propuxeron a elaboración de murais.
Foi un acto curto, sinxelo, pero realmente emotivo. E iso apreciábase no silencio e no respecto co que todo o mundo escoitaba a lectura dos compañeiros e compañeiras. E no marmurio que inundou o patio durante a lectura de Deitado frente ao mar.
Unha (ou varias) imaxes valen máis que mil palabras. Por iso, aquí tendes algúns flashes deste día:
En todo intre, este acto vencellámolo co Proxecto Documental Integrado deste curso. Porque un acto en defensa da nosa lingua non pode desvincularse dun proxecto que trata sobre a Tradición Oral. Neste vídeo podedes relembrar o que aconteceu:
Grazas á Coordinadora Galega dos Equipos de Normalización e Dinamización Lingüística por convocar esta fermosa acción que conqueriu que 200 centros educativos e 30.000 alumnos e alumnas vibrásemos, ás 12 do mediodía, coa mesma frecuencia.
No hay comentarios:
Publicar un comentario