Chega o Nadal, e todos identificamos estas festas con turrón e cava. Pero... sabedes que, no mundo, existen infinidade de pans doces que se cociñan nestas datas de xeito tradicional...?
Como nos conta
Pepe Iglesias na súa fantástica web
Enciclopedia de Gastronomía.es, para coñecer a orixe destes pans doces temos que nos remontar "ós tempos cando os animais falaban". A produción a niveis industriais da cana de azucre non comezou en América ata despois da colonización (a pranta foi introducida por
Colón na súa segunda viaxe); e a remolacha azucareira non se estendeu ata as guerras de
Napoleón.
Así pois, ata a
época dos árabes (século VIII en adiante) non se coñecían máis endulzantes que o mel e a froita sobremadura (froitas confitadas, escarchadas ou pasificadas).
As festas do Nadal teñen a súa orixe moito antes da era cristiá, cando a agricultura (e a supervivencia) mandaban no calendario. Daquela, o inverno era a época escura do ano, na que non se podía traballar no campo, e na que había moito tempo de ocio. Como non existía produción, pasábase fame. Por iso, a chegada do
solsticio de inverno (21 de decembro) considerabase unha grande festa, xa que, a partir dese día, as horas de luz ían aumentando e a esperanza de ter unha boa colleita medraba.
E... cando renace a esperanza... hai que festexalo! Así que, nesas datas, botábase "a casa pola fiestra", e comíase o que non se comía en todo o ano. Ademais, con tanto tempo libre, había horas dabondo para elaborar receitas moi complexas, que mesturaban froitos secos, fariña e graxas procedentes da matanza e curadas ó frío.
Investigando, temos descuberto que, en toda Europa (e tamén en América, grazas á Conquista e á emigración) son tradicionais estes pans doces. Así que, nestes días, o alumnado de todas as aulas está traballando sobre o tema (xa vos mostraremos os seus resultados).
Mentras tanto, deixámosvos con varias cousas. En primeiro lugar, coa
nosa decoración navideña, na que participaron todas as familias do noso Centro. Nesta ocasión, como vos contabamos noutro
post, tratouse de decorar un panettone. E, como veredes, saíron traballos fantásticos e moi creativos.
Uns traballos estupendos, e só unha mostra do moito que se ten feito.
En segundo lugar, deixámosvos este LIM sobre os Pans doces de Nadal que ten preparado o Equipo TIC do noso Centro. Para ir avanzando no tema.
E, por último, convidámosvos a nos visitar cando estean publicados os traballos que están preparando os nosos alumnos.
