ESTREAMOS CLUBES DE LECTURA!

Hoxe ten sido un día importante na Biblioteca: durante o recreo, as súas portas pecháronse (por fóra) para acoller a primeira xuntanza dos clubes de lectura. 

Os protagonistas, un nutrido grupo de rapaces e rapazas de 5º de Primaria, moi entusiastas e con moitas ganas de ler e de compartir lecturas.

O primeiro que fixemos (como eramos moitos) foi repartirnos en dous grupos, e pórlles nome. Estes resultaron moi suxerentes: Libro & Co. e Locos por los libros.

Logo repartimos os exemplares do libro proposto: O chápiro verde, de Marilar Aleixandre, e os cadernos para facer as nosas anotacións.

Todos isto endulzado cun biscoito de iogurt e uns suculentos bombóns que fixo para nós, con grande agarimo, Olga, sempre disposta a colaborar co que faga falla.

O tempo pasou voando (estabamos ben a gusto). Pero aínda houbo ocasión para fixar as datas para a próxima xuntanza e para facer unhas fotos. Así que os membros de Libro &Co. nos reuniremos o martes 22 de marzo; e os de Locos por los libros, o xoves 24. 

Non queremos deixar pasar a ocasión sen dar as grazas a un montón de persoas que teñen feito posible que hoxe déramos este paso:

• Bea G., do C.E.I.P. Fermín Bouza Brey de Ponteareas, polos seus bos consellos (especialmente o do biscoito de chocolate);

• Concha e Adela, do I.E.S. República Oriental do Uruguai, por nos meter no corpo o "formiguillo" dos clubes de lectura;

• os compañeiros e compañeiras bibliotecarios de varios colexios (C.E.I.P.s Carrasqueira, Balaídos, Illas Cíes, Carballal, Mosteiro-Bembrive, Cedeira, A Doblada) que nos proporcionaron os exemplares suficientes para levar a cabo esta actividade;

• Montse, a profe de Inglés, por poder contar sempre con ela para estas "tolemias colectivas";

• miña nai, por nos endulzar a vida;

• os nosos marabillosos alumnos e alumnas de 5º de Primaria, tan entusiastas coas súas recomendacións e as súas lecturas; 

• e, como non, Conchi e a Luz (as súas titoras) por lles inculcar ós seus alumnos e alumnas a afección e o amor pola lectura. 

Deixámosvos coas imaxes do día: