Aínda que o Día do Libro Infantil se conmemora o 2 de abril, a proposta foi trasladalo ó día de hoxe (12 de abril), por coincidir a data oficial coas vacacións de Semana Santa.
Ás 12:00 da mañán, todo o Centro se reunió no Salón de Actos. O primeiro que fixemos foi explicar a razón de estar todos reunidos. A continuación, pasamos ó Manifesto redactado por Eliacer Cansino para a ocasión. Sen embargo, dado que o noso alumnado é de Educación Infantil e Primaria, en lugar de lelo, decidimos elaborar unha presentación, para que, deste xeito, resultara moito máis visual e atraínte para os cativos. Podedes vela a continuación:
Rematado o Manifesto, un representante de cada aula leu as cartas que, co gallo do noso Proxecto Documental Integrado (Un conto, un libro: o mundo!) estamos a preparar para festexar o Día do Libro.
Resultou un acto realmente emocionante. Un deses días en que non podemos dicir máis que "estamos moi orgullosos do noso alumnado". E por varios motivos: polo ben que se portaron (a pesar de que o acto durou máis dunha hora); porque nos teñen demostrado que están aprendendo moitísimo coas actividades relacionadas co Proxecto; e, por último, porque quedamos todos abraiados pola beleza e gracia das cartas coas que nos teñen agasallado. Aquí podedes contemplar algunhas fotografías da rapazada en plena acción.
Para rematar un día tan estupendo, temos "colleitado o froito da nosa semente". Hoxe remataba o prazo para presentar os traballos de poesía realizados en familia (podedes ver a actividade neste enlace). O xurado aínda ten que valoralos, pero o Equipo de Biblioteca está tan satisfeito coa participación, que non somos quen de despedirnos sen vos mostrar o recuncho que temos instalado. Seguro que a laboura dos membros do xurado non será nada doada, porque hai propostas realmente espectaculares. Xa volas iremos presentando pouco a pouco!
Grazas a todos e a todas (pais, nais, mestres, mestras, alumnos e alumnas) pola vosa participación, e parabéns polos magníficos resultados!
1 comentario:
Gustáronme moito todas as cartas de tod@s @s ne@s.Estivo moi entretido.Grazas.
Publicar un comentario