24 de MARZO: DÍA MUNDIAL CONTRA A TUBERCULOSIS

Con tantas actividades como temos tido estes últimos días do mes de marzo ténsenos esquecido esta data: o Día Mundial contra a Tuberculose.

Estamos todos no mesmo "círculo vicioso". Temos a nosa mente demasiado ocupada. Como lembrarnos dunha enfermidade que apenas ten incidencia en Europa? Sen embargo, a tuberculose ocasiona miles de víctimas nos países en vías de desenvolvemento. Trátase, pois, doutra enfermidade "esquecida", doutras víctimas "invisibles".

Nesta data en que lembramos o descubremento do bacilo da tuberculose polo doutor Robert Koch (o 24 de marzo de 1882) unha ONG tan pouco sospeitosa como Médicos sen Fronteiras achéganos esta información para concienciarnos sobre o problema.

Agora xa non temos argumentos para dicir que non estamos informados!

OS PAPIS E AS MAMIS TAMÉN VAN Á ESCOLA

Hoxe, xoves 25 de marzo de 2010, un grupo de pais e mestras do noso Centro reunímonos para aprender sobre a película Kirikú y la bruja, de Michel Ocelot.


Contamos para iso cunha intervención de luxo: Carmen Pereira, profesora da Universidade de Vigo especialista en Educación en Valores. Para saber máis sobre ela e sobre o seu traballo, podedes consultar a súa páxina web neste enlace.

Tras o visionado da cinta, iniciamos un diálogo grazas ó cal descubrimos un montón de temas susceptibles de ser traballados en familia e co noso alumnado: a solidariedade, a importancia do grupo, as faladurías, os prexuízos, a necesidade de dar ós cativos bós exemplos que podan imitar, a necesidade de que deixemos liberdade ós nenos e nenas para crecer de xeito creativo, sen sobreproteccións...

Aquí tendes algunhas pistas para traballar esta e outras películas, e para coñecer África un pouco máis polo miúdo:

• Os valores do cine de animación. Propostas didácticas para pais e educadores.
• Cine e multiculturalidade.
• Invisibles (documental integrado por cinco curtametraxes, galardonado cun Premio Goya).
• Pinceladas sobre a música africana.

E aquí, algunhas imaxes desta actividade tan familiar e entrañable: 

Os europeos, en moitas ocasións, cremos que non temos nada que aprender dos países en vías de desenvolvemento. Nada máis lonxe da realidade! En África existen un sinfín de valores que nós hai tempo que temos perdido.

A continuación atoparedes unha curtametraxe de grande beleza e de enormes posibilidades educativas: Binta e a gran idea, dirixido por Javier Fesser. Binta e a gran idea estivo nominada ó Oscar 2007 como mellor documental.


Binta y la gran idea from dburgui on Vimeo.

A distancia e o descoñecemento fan que, en moitas ocasións, teñamos unha idea deformada da vida en África.

Do mesmo xeito, as imaxes da prensa e da televisión contribúen a que os africáns teñan unha visión idealizada da vida en Europa, o que, ás veces, lles anima a correr grandes perigos para saír dun mundo sen esperanza.

A viaxe de Saíd é unha fantástica curtametraxe (galardonada cun premio Goya no ano 2007) que abunda nesta visión idealizada. Está dirixida por Coke Rioboo:

DIA DA POESÍA EN FAMILIA

21 de MARZO: Día da Poesía 

21 de MARZO: Inicio da Primavera

Chegou a Primavera! Este arrecendo que enche o aer parece confirmalo: o 21 de marzo é a data máis axeitada para celebrar o Día da Poesía.

No noso cole, este curso, queremos centrarnos nunha figura moi especial: Miguel Hernández, de que celebramos o Centenario do seu nacemento. 

Pero, por outra banda, queremos que toda a Comunidade Educativa lea poesía, se emocione coa poesía e disfrute ilustrando poesía. 

Así que, como noutras ocasións, animamos a todos a Facer Familia en Frian, cunha actividade de pais e fillos consistente en ilustrar algúns poemas escollidos para a ocasión.

Como xa sabemos que todos sodes uns artistas, estamos desexando que chegue a data da recepción dos traballos, para poder disfrutar deles!

Día da Poesía 2010


FELIZ INICIO DA PRIMAVERA...

... E FELICES E POÉTICAS LECTURAS!

O XOVES, VIDEOFORUM PARA PAIS E NAIS

Continuando co noso Proxecto Documental Integrado, o vindeiro xoves 25 de marzo temos actividades para os adultos: unha sesión de videoforum para pais, nais e mestres.

Acompañaranos nesta ocasión toda unha experta na materia: Carmen Pereira Domínguez, profesora da Universidade de Vigo, a quen temos a honra e o pracer de coñecer, porque é quen de pór en práctica esa frase que ten elixido como lema da súa páxina persoal: Vivir con modestia, pensar con grandeza.

A partir do visionado da película Kirikú y la bruja (unha xoia do cine de animación) Carmen nos axudará a desentrañar todos os valores relacionados coa Interculturalidade.

Animámosvos a todos os adultos da nosa Comunidade Educativa (pais, nais, avós, avoas, mestres, mestras...) para que participedes nesta actividade. É un bo xeito de coñecernos mellor a nós mesmos e ós demais membros da Comunidade Educativa, e de traballar sobre os valores que tanto necesitan o mundo e o noso alumnado. 

Vémonos o xoves con Carmen, ás 16:30 horas!  

O NOSO PROXECTO XA TEN MURAL!

Despois de moitos meses de arduo traballo, o noso Proxecto, por fin, xa ten mural!

Temos que dar as grazas a todo o profesorado (membro ou non do Equipo de Biblioteca) que ten deixado tantas horas de esforzo, creatividade e bo facer para conseguir esta preciosidade de mural. 

Un grazas tamén moi especial a María, sempre atenta e disposta a aportar o seu gran de area. 

ADEUS, MIGUEL

Atopamos esta imaxe aquí

Todavía somnolentos, comenzamos a mañán coa triste nova do pasamento de Miguel Delibes, grande mestre das Letras Españolas. 

Foise de mañanciña, cando a luz do novo día apagaba o resplandor da derradeira estrela, e cando finos copos de neve comenzaban a alfombrar as rúas de Valladolid, a súa cidade natal. Fermosa e sinxela forma de marchar, como de puntiñas. A natureza, á que tanto amaba, pareceuse conxurar para facer deste un intre máxico, inesquecible. Máxico e sen excentricidades, porque así de sinxelo era Miguel Delibes.

Que grande que, cando alguén remata a súa vida, todo o mundo, unanimemente, poda dicir sobre el: "era un home bo"! Así era el: un home bo, do pobo, un "periodista metido a escritor", un narrador de pluma sinxela, un cantor da súa terra e das xentes da súa terra: Castela.

Adoitaba dicir: "para ser escritor non tes que ter estudiado en París nin ter lido o Quixote".

Como mestres implicados na tarefa de facer ler e escribir ós nosos alumnos e alumnas, paréceme un magnífico consello, e unha grande lección. Aproveitemos o que vivimos, o que somos, afeccionémonos a escribilo!

Fagamos uso de todos os medios ó noso alcance: a pluma e o papel, como non! Pero tamén as novas tecnoloxías, ás que Miguel Delibes, cos seus 90 anos, non renunciou!

Aquí podedes velo e escoitalo presentando a súa páxina web:

E como se trataba dun home sinxelo, despidámonos del só con dúas palabras. Coas súas propias palabras, sinxelas, fermosas, tenras:

MILANA BONITA

DÍA MUNDIAL DOS DEREITOS DO CONSUMIDOR

O vindeiro luns 15 de marzo celebraremos o Día Mundial dos Dereitos do Consumidor.

Por suposto que os consumidores temos dereitos. Pero tamén temos obrigas. E debemos ser responsables co que consumimos.

Por iso, este vídeo, do que tivemos novas hai tempo a través de Cristina Novoa, parécenos moi axeitado para celebrar esta data.

Concienciémonos! É a nosa obriga!

Por outra banda, aproveitando esta data, queremos darvos a coñecer estes anuncios que teñen elaborado os alumnos e alumnas de 4º B de Primaria.

A actividade tivo a súa orixe na conmemoración do Día da Paz. Os rapaces decatáronse de que tras o comercio do café existía un submundo onde se explotaba ás persoas e á natureza. Por iso decidiron crear estes anuncios nos que nos aconsellan consumir nas tendas do Comercio Xusto.

Como veredes, algúns deles incluso poden triunfar como guionistas e actores!

8 DE MARZO: DÍA DA MULLER TRABALLADORA

Seguindo co noso Proxecto Documental Integrado deste curso (Un cole, un libro: o mundo!) temos proposto que cada grupo investigara sobre as mulleres senlleiras nos países e continentes nos que está a traballar. 

Se queres ver o que temos investigado, acude páxina web da Biblioteca.

AS LINGUAS, FERRAMENTAS PARA A COMUNICACIÓN

Hoxe, venres 5 de marzo, tivemos no cole unha visita moi especial: a nosa amiga Sabela, que, a pesar da súa xuventude, ten ben claro o que quere chegar a ser: nada máis e nada menos que Traductora na O.N.U.

Seguindo co noso Proxecto Documental Integrado (Un cole, un libro: o mundo!), que mellor que gozar de alguén apaixoado polas linguas?

Os alumnos e alumnas de 4º, 5º e 6º curso de Primaria disfrutaron dunha sesión extra de Inglés, cargada de anécdotas sobre a vida de Sabela nos Estados Unidos. I é que... as linguas, serven para nos comunicar, para coñecer outras culturas, e para unir... nunca para separar!

Grazas, Sabela, e sorte na túa nova andaina!