PROBANDO DISTINTOS TIPOS DE PAN

Ou investigar tamén co padal.

Hai unhas semanas, as profes María e Elisa prepararon unha degustación de pans para os nenos e nenas de 1º de Primaria. Como sabedes, os rapaces deste nivel están a traballar sobre os distintos tipos de pan, no marco do noso PDI (A lingua sabe a pan). Sendo así, investigar tamén co padal resultaba unha obviedade.

Aquí, os tendes, pois, disfrutando deste suculento manxar.

OS ALUMNOS E ALUMNAS DO IES CÓNTANNOS CONTOS

Con Henar e Maite, as súas profesoras, ó frente.

O luns e martes pasados (28 e 29 de abril) estiveron compartindo a mañán connosco os membros do Clube de Lectura de 3º da ESO do noso IES de referencia (República Oriental do Uruguai). Isto permitiunos retomar o contacto con algúns dos nosos alumnos máis queridos: Alba, as Saras, Vicente, Alicia... que estiveron acompañados por dúas novas compañeiras: Ana e María.

Con moita ilusión e moito traballo prepararon para os máis cativos os contos de Garavanciño e A Mosca Chosca. E para os de 1º curso de Primaria, Os catro amigos e O galo Quirico.

Rematado o conto, axudaron á rapazada a desenvolver as actividades que tiñan preparadas. E gozaron todos: os cativiños e os invitados.

Como é de ben nados ser agradecidos, o seu esforzo foi premiado cunha pequena merenda e cun agasallo que lles entregou Olga, a nosa directora.

Moitas grazas, chicos e profes, por esta mañán tan deliciosa e engaiolante!

UNHA NOVA DE LIBRO

Moi oportuno, xa que celebrabamos a Semana do Libro.

O pasado venres 26 de abril, os alumnos e alumnas de 5º B foron os encargados de preparar A Nova da Semana. Estando no mes de abril, e máis, na semana do Día do Libro, semellou moi axeitado destacar unha nova chegada dende Tui: o troco de libros no Paseo da Corredeira.

Aquí tendes a cartolina coa súa nova.

Moita literatura infantil coñecen estes rapaces...!

REGUEIFANDO SOBRE O PAN

5º A canta no seu Venres de Viva Voz.

Emulando ós grandes regueifeiros deste país e de Portugal, os rapaces e rapazas de 5º A inventaron regueifas sobre a temática do noso PDI: A lingua sabe a pan.

Aquí os tendes en plena acción.

Parabéns!

TIPOS DE PAN

Un traballo da aula de 1º A.

En relación co noso PDI A lingua sabe a pan, os nenos e nenas de 1º A estiveron a investigar sobre o pan. Nesta presentación falan sobre as distintas tipoloxías.

Parabéns, chicos!

A GUERRA DOS NÚMEROS

Un conto que fala do importante que é aceptar a todos coas súas diferencias individuais.

O pasado mércores día 24, Ana, a nai de Aldara (3º A) estivo na biblioteca para nos contar este conto. Que importa que o 1 sexa o máis pequeno...? El mesmo ten que aceptar que todos somos diferentes, e iso é unha riqueza. O intentar chegar á uniformidade só produce soidade, enfrentamentos e enemistade.

Despois de contar, aproveitamos o bo tempo para, no patio, xogar a eses xogos tradicionais que coñecían os nosos pais e que nós temos un pouco esquecidos.

Grazas, Ana e Aldara, por esta fantástica tarde. (E tamén á profe Elena, que foi "os nosos ollos").

A NOVA DE 3º B

Sobre a presencia de medusas velenosas na Ría de Vigo.

A semana pasada, tocou o turno ós alumnos e alumnas de 3º B para preparar a súa Nova da Semana. Esta nova local foi a seleccionada por eles.

Moito ollo...!