DOCE NADAL

O Equipo de Biblioteca, e toda a Comunidade Educativa do CEIP Frian - Teis deséxavos un Doce Nadal .

E, para facelo, que mellor que compartir convosco o resultado do noso traballo.

Como ben sabedes, o noso PDI deste curso titúlase A lingua sabe a pan. Por iso, os nosos alumnos estiveron a investigar sobre os pans doces que son típicos no Nadal en moitos países.

Antes de nos despedir, tres consellos: 

• Aproveitade as ocasións que se nos ofrecen para pasar unhas felices vacacións en familia. En Vigoentrefamilias póñennos ó día,

• Lembrade que tamén podemos agasallar en galego. Estas son as propostas da Coordinadora Galega de Equipos de Normalización e Dinamización Lingüística.

• Por último: non hai mellor regalo que a lectura, que nos abre horizontes e nos fai libres. Refrescade as recomendacións da nosa Biblioteca. 

Para todos e todas, Feliz Nadal!

FESTA DO NADAL

O venres 21 foi un día especial no noso colexio. 

Para celebrar o fin de trimestre, no cole programamos un día distinto, no que a ANPA tivo un papel fundamental.

Antes de nos reunir no Salón de Actos, nas aulas houbo moita actividade, ultimando adornos de Nadal. Mentras, na ANPA, un feixe de pais e nais traballaban arreo preparando chocolate e bica para todos.

E despois desta fantástica merenda compartida, subimos ó Salón de Actos, onde disfrutamos dunha fantástica obra protagonizada polos nenos e nenas do Obradoiro de Teatro: O parrulo da Paz.

Como o tempo corría na nosa contra, dende o noso sitio cantamos as panxoliñas tradicionais galegas preparadas por cada nivel. Os de 5º de Primaria estiveron acompañados polos profes Manolo e Ana Fernández, tocando, respectivamente, o tamboril e a pandeireta.

E, para rematar, unha visita sorpresa: dende o Polo Norte, directamente en Frian, Papá Noel.

Grazas a todos e a todas os que, co seu traballo e agarimo, fixeron posible esta fantástica festa!

CHEGOU O INVERNO

Último Venres de Viva Voz do 2012.

Ata o vindeiro ano 2013, remataron os Venres de Viva Voz por este curso. E os encargados de pórlle peche foron os nenos e nenas de Educación Infantil 5 anos A, que recitaron un poema sobre O inverno. Moi axeitado, xa que acabamos de estrealo.

Grazas, chicos e chicas!

A PELÍCULA DE ANA

Este é o título da nova que elixiron os nenos e nenas de Educación Infantil 5 anos B.

A última Nova da Semana do 2012 tivo como protagonista a Ana, unha nena de A Coruña que padece cinco enfermidades distintas. Recentemente, presentouse unha película que explica a súa historia.

Para explicala, os rapaces de 5 anos B fixeron este precioso mural, que vos presentamos fotograma a fotograma.

Para rematar, neste vídeo podedes ver como presentaron a súa nova ó resto dos compañeiros. Estaban tan nerviosos que precisaron a axuda da súa profe. Pero iso é natural, como a vida mesma!

Parabéns por un traballo tan estupendo. Tratouse dunha auténtica tarefa de investigación sobre a prensa. 

ADOPTANDO LIBROS

Na nosa Biblioteca existe un feixe de libros para adultos que están orfos de lectores. 

Por iso, este ano (despois da idea tomada dalgún centro integrado no PLAMBE) temos promovido a iniciativa titulada Adoptando libros polo Nadal.

Os libros saíron dos andeis, e, grazas ós nenos e nenas, chegaron onda os seus pais. Pero, antes de facelo, sufriron un laborioso proceso. Queredes coñecelo...?

Primeiro, cada aula acudiu á Biblioteca e escolleu o libro máis axeitado ó seu pai ou á súa nai. 

Logo,  houbo que empaquetalo. Se premes aquí, descubrirás ós alumnos de 5º e 6º de Primaria en plena acción. Despois de aprender, algúns deles acudiron ás aulas de Infantil para, á súa vez, axudarlles. Comprobádeo aquí. 

Os paquetes quedaron preciosos. Esta é unha pequena mostra:

E, finalmente, seguiron o seu camiño. 

Agora xa están nos seus novos fogares, onde esperan ser lidos con agarimo. Co mesmo agarimo con que os rapaces teñen escollido un libro para os seus pais. 

GARBANCITO

Este foi o título do contacontos do pasado luns.

Estivo a cargo de Aroa (2º A) e de Úrsula, a súa nai. Todos os asistentes estiveron moi atentos, e aprenderon aquilo de:

Pachín, pachín, pachán.

Cuidadito con lo que haceis.

Pachín, pachín, pachán.

A Garbancito no piseis.

E logo, con cáscaras de noz, garabanzos, paciencia e imaxinación, cada rapaz marchou co seu propio Garbanciño.

Grazas pola última Tarde de Conto deste ano 2012.

PARA LER NO NADAL

Chega o Nadal.

Un tempo propicio para a lectura e os agasallos.

Para orientarvos na elección de lecturas, no Equipo de Biblioteca temos seleccionado algunhas das moitas que nos ofertan as editoriais por estas datas.

Respecto a outros anos, a nosa selección presenta dúas novidades:

• Se premedes en cada título, atoparedes un enlace no que se vos fala sobre o argumento ou o contido do libro. Así poderedes orientarvos mellor e facer a elección que máis vos interese. 

• Tamén incluímos tres lecturas para pais e nais que poden contribuír a mellorar as relacións cos vosos fillos. 

Coma sempre, incluímos música e lecturas en Inglés. 

Esperamos que o que temos escollido resulte do voso agrado. 

Felices Lecturas polo Nadal!