Talvez esteamos a escribir historia. O caso é que o noso cole participou esta mañán na I Quedada Literaria, con outros coles de Vigo: Chouzo, Ría de Vigo, Carrasqueira, O Pombal, Santa Mariña de Redondela, o IES de O Castro e o IES Pino Manso de Porriño.
Foi unha xornada de lectura en lingua galega, e de compartir libros, merendas, experiencias e fala. Unha auténtica homenaxe á nosa lingua polo Día das Letras Galegas.
Participaron do noso cole os alumnos pertencentes ós clubes de lectura de 5º e 6º curso de Primaria, e os de 2º A, que, como sabedes, son os máis lectores e investigadores do colexio.
A nós tocounos compartir lectura e merenda cos rapaces do terceiro ciclo de O Chouzo e cos de 2º do Ría de Vigo.
Logo, xuntanza nos xardíns do Pazo para o acto de Clausura, que estivo amenizado por Uxía Blanco. Os nosos nenos recitaron dous poemas de Antón García Teijeiro (O mar e Polas ondas un navío) e contaron a historia de Cormarín. Fixérono de marabilla. Estamos moi orgullosos deles.
Quixeramos salientar a magnífica tarefa organizativa de Antonio Fernández (compañeiro nas tarefas bibliotecarias do CIFP Manuel Antonio) e de Marta (técnica de Normalización Lingüística do Concello de Vigo). E non faltaron nin a tele nin Protección Civil para nos acompañar.
Grazas, Antonio e Marta, por facer posible un día tan fermoso.
No hay comentarios:
Publicar un comentario