UNHA APERTA POLO NADAL

Page URL:	http://mrg.bz/cISrIh
Image URL:	http://mrg.bz/3GyM98

Na Noiteboa a nosa imaxinación lévanos a unha cea familiar ó carón do lume. 

Pero, en realidade, non hai nada máis gratificante, cálido e confortable que unha aperta de oso, dada co corazón. 

Grazas a Gema Cilleiros, do CPI Pontecarreira, por compartir connosco estas apertas virtuais. 

Feliz e agarimoso Nadal!

UNHA ÁRBORE DE NADAL CON SORPRESA

Page URL:	http://mrg.bz/tnwLnD
Image URL:	http://mrg.bz/2ipsGQ

Despois de ter traballado as Tradicións Navideñas, paga a pena rir un pouco.

O Pequeno Libro de Notas desta semana agasállanos con este divertido vídeo titulado A árbore de Nadal de Pluto. Porque... ás veces, ás árbores veñen con sorpresa.

FIN DE TRIMESTRE MOI VARIADO

E xa para rematar o primeiro trimestre, hoxe día 21 de decembro, no Mércores de conto, tivemos seis contacontos de luxo.

Iván de 5 anos , contóunos Federico; Lucas de 9 anos atrévese con Pulga Xigante; Silvia de 9 anos contounos o Nariz de Ouro; Masha de 6 anos lanzouse en Língua Inglesa con Spot's First Walk; Adrián, tamén de 6 anos repetiu con Pétala e Aroa de 6 anos rematou con La sorpresa de Nandi .

Todos e todas estiveron encantados e encantadas de aportar o seu gran de area a nosa biblioteca.

Grazas a todos e todas!!!

TRADICIÓNS NAVIDEÑAS NO MUNDO

Despois de traballar durante o Primeiro Trimestre o cómic, agora vos presentamos a nosa reportaxe sobre as Tradicións Navideñas no Mundo.

Como os traballos están feitos por niveis ou ciclos, amosámosvos este poster con todos.

AS NOSAS RECOMENDACIÓNS PARA ESTE NADAL

Esta é a nosa pequena aportación dende a Biblioteca, recomendando a lectura no Nadal.

TEATRO PARA ESTE VENRES DE VIVA VOZ

Os nenos e as nenas de 4ºB no Venres de Viva Voz, fixemos unha pequena representación da obra El pajarillo herido.

Trata dun paxaro ferido que vai pedindo acubillo as distintas árbores do bosque para poder pasar o inverno. Só o abeto lle ofrece fogar e é por iso polo que o abeto non perde as súas follas.

Grazas por este traballo!!!

CONTRA O FUME NO NOTICIEIRO ECOLÓXICO

Os nenos e as nenas de 1ºA traballamos o cambio climático.

As fábricas botan moitos fumes e contaminan moitísimo. Por iso fixemos uns carteis nos que expresamos que non queremos fumes, nin contaminación. 

Gústanos moito a natureza e temos que coidala para que o noso planeta Terra, estea limpo e san.

TARDE DE CONTO E DE PAPIROFLEXIA

Esta nova convocatoria de Mércores de Conto xuntounos a moitos, de tal xeito que non poidemos estar na nosa Biblioteca, porque o espazo era insuficiente.

Grazas a Portal Rodríguez, a nosa mestra de pintura de Actividades Extraescolares, que nos convocou para traballar nun obradoiro de papiroflexia. Aprendeunos a facer moitas actividades con papel, e pasamos unha tarde moi pero que moi divertida.

E para rematar fainos un gran agasallo!!!

XUNTANZA CLUBES LECTURA

   

Este martes 13 e o mércores 14, no recreo, fomos convocados na primeira xuntanza os clubes de lectura Locos por los libros e Libros & Company para comentar o libro Relatos para un tempo novo.

Este pequeno libro contén tres historias independentes, creadas por tres escritores moi importantes da nosa literatura:  Xoán Babarro, Mª Victoria Moreno e Agustín Fernández Paz. Os textos fixéronnos afondar en tres temas principais: O Misterio, o Racismo e o Amor.

Queredes saber cal foi o que máis nos gustou? Pois Pan con chocolate, onde Eva escribe a Adonay, un rapaz xitano, compañeiro de escola e o seu primeiro amor, unha preciosa e conmovedora carta. El é un dos desaparecidos polo temporal que levou por diante a cidade e o poboado xitano...

Pero tamén temos que mencionar que Unha pedra na area nos deixou unha forte pegada: a través do diario de Alba descubrimos que a aparición dun meteorito na praia lle vai axudar a superar a indecisión de poder saír co seu amigo Xabier.

Aquí tendes unha reportaxe fotográfica sobre as nosas xuntanzas:

Grazas a todos e todas pola vosa colaboración, e á profe Luz polo seu traballo!!! 

CEN ANOS DE ÁLVARO CUNQUEIRO

No ano 2011 que estamos a piques de rematar celebramos o Centenario do nacemento de Álvaro Cunqueiro. 

Aínda que nado en Mondoñedo, a nosa cidade (Vigo) tivo unha grande significatividade na súa vida. E Don Álvaro é tamén, para os vigueses, un sinal de identidade, igual que o Celta, o Cristo da Victoria ou o Faro de Vigo, xornal no que desenvolveu a súa tarefa periodística. Aínda sen telo coñecido, o seu espírito campa polas nosas rúas, e o seu nome evoca relatos fantásticos, parrafadas cos amigos na Taberna de Elixio ou o sabor dun bo prato da terra.

Achegámosvos estas presentacións que ten realizado Elvira Roiz, do IES Concepción Arenal, e que a súa compañeira Ana Vizoso nos deu a coñecer a través do PLAMBE.

Grazas a ambas as dúas por achegarnos dun xeito tan sinxelo e claro a esta figura clave na nosa literatura. 

Podedes aprender co resto das presentacións neste enlace. 

A VOLTAS CO BET

Xa casi un mes despois de se celebrar en Santiago o Congreso Bibliotecas Escolares en Tránsito, voltamos retomar o tema. 

Porque os materiais do Congreso xa están publicados, e é bo difundilos e dalos e coñecer. Atoparédelos neste enlace. 

E porque me gustaría que tamén experimentárades a emoción que creo que sentimos todos e todas as presentes cando escoitamos o discurso inaugural do Ministro de Educación, Ángel Gabilondo. Porque, independentemente da nosa cor política, o que é innegable é que se trata dun home mesurado, e ponderado. Deixounos mensaxes tan fermosos como:

• Aínda que pareza mentira, hai moitas cousas que podemos facer xuntos (...) porque precisamos uns dos outros. 
• Biblioteca Escolar é sinónimo de afecto, sentido, forza, verdade. 
• Un non deixa de aprender a ler toda a vida. 
• O que non se evalúa, devalúase. 
• Ler é vivir (Flaubert).

Espero que disfrutedes e aprendades moito (aínda que non sexa en vivo e en directo).

IDEAS PARA UNHA EDUCACIÓN DO SÉCULO XXI

Este é o título dun post que veño de atopar no blog do meu amigo Fran Iglesias. 

Coma sempre, elaborado con grande meticulosidade e con argumentos sólidos. Sen desperdicio. Para apoiarnos na idea de traballar con proxectos documentais integrados, de xeito globalizado, e empregando soportes variados.

Atoparedes o seu blog nesta dirección:

http://franiglesias.tumblr.com/

e ese artigo que tanto me gustou, neste enlace.

Espero que vos guste tanto como me gustou a min. 

10 de decembro: DÍA DOS DEREITOS HUMANS

   

Facemos hoxe pública esta entrada conxunta dos blogues das Bibliotecas Escolares de Galicia. Unha entrada que fala dunha fermosa iniciativa: o Bubisher, ou... como podemos colaborar todos e todas para difundir a lectura entre os campamentos de refuxiados saharauis...?

63 anos despois da súa proclamación, segue sendo necesario lembrar esta data, 10 de decembro, na que a Asamblea Xeral das Nacións Unidas aprobou a Declaración dos Dereitos Humanos.

Necesario porque nin tan sequera nos países que asinaron esta declaración están garantidos estes dereitos en igualdade de condicións para toda a poboación. Non hai máis que botar unha ollada ao noso arredor, asomarse ás noticias.

Mais aínda así cabe pensar que un outro mundo é posible, que hai arrecendos espallados no ar que nos permiten prender unha candea pola esperanza, por estas xeracións, hoxe nen@s, adolescentes, que medran nas nosas aulas, ao abeiro das nosas Bibliotecas -das súas lecturas, da súa información, da súa formación- nen@s e adolescentes que se implican ilusionad@s e con empeño en proxectos coma "Coñecernos para querernos", nun intercambio persoal e de coñecementos con nen@s dos campamentos saharahuis, para quenes a apertura dunha biblioteca con (o Bubisher) ou sen (O Niño do Bubi) rodas, supón moito máis que un mundo de oportunidades. Para acceder á ilusión, aos soños, á formación, ao coñecemento doutras culturas, doutro idioma.

E con esa candea acesa, brincan faíscas que prenden en case un cento de Bibliotecas Escolares Galegas, que por todo o país escollen cada unha un fermoso álbum ilustrado para agasallar a ese recén estreado Niño do Bubi, porque, coma nas nosas propias Bibliotecas, toda inauguración é unha festa. A esa festa que é a lectura, nesas bibliotecas acubilladas na area, queremos enviar estes álbumes como aves portadoras de boa sorte, como bubishers* cheos de cor, imaxes, historias. Porque as nosas bibliotecas, @s nos@s lectores e lectoras, compartimos co Bubisher, cos lectores e lectoras das súas bibliotecas a crenza firme nos Dereitos Humanos, dende o seu 1º artigo: "Tod@s nascemos libres e iguais en dignidade e dereitos"

* O bubisher (Oenanthe leucopyga e Oenanthe leucura) é un paxariño tímido que vive na Península e tamén en África, aquí chamámoslle collalba negra e no Sáhara o seu nome significa paxaro da boa sorte, no dialecto hassaní é Bubchir بوبشير (o da boa nova) porque adoita aniñar e criar despois das choivas, o que quer dicer que medrará a herba, algo moi importante para quen ten gando.

Bubisher é tamén o nome dun autobús-biblioteca que circula entre os campamentos do Sáhara para levar lectura e información. Ou sexa, unha biblio... pero con rodas!!!

Se queredes unirvos á iniciativa de Álbumes para o Bubisher, só tedes que poñer os vosos datos xunto ao resto das Bibes Galegas.

Música e DDHH

Texto de Maribel Serantes (CEIP Os Casais)

NOVA TARDE DE CONTOS

Hoxe día 7 de Decembro na Biblioteca do cole tivemos un novo contacontos.

Nesta ocasión escoitamos a Roberto, pai da nosa compañeira de 3 anos, Icía . Primeiro contounos o conto Grandes contra pequenos, no que un sapo pícase cunha raposa e decláralle a guerra. Logo, sempre moi atentos, escoitamos O porquiño, que falaba dun porquiño que vivía nunha granxa. Como o disfrutamos!!!

Ó rematar, coloreamos, pintamos e recortamos os personaxes que apareceron nos contos.

Grazas, Roberto, por esta tarde tan animada!!!

TRADICIÓNS NAVIDEÑAS, LENDAS E OS PLANETAS PARA UN NOVO VENRES

Este venres día 2 de decembro, os nenos e as nenas de 6º B participaron un venres máis alzando a súa voz, e formaron tres grupos de traballo.

O primeiro grupo expresa a súa opinión sobre as tradicións navideñas. De xeito moi orixinal, este grupo falounos das tradicións navideñas en Escocia e Brasil. Logo, interpretaron unha canción de Nadal en inglés, titulada: Rudolph the red nose reindeer.

O seguinte grupo investigou sobre as lendas. Fálannos da Lenda do Bosque da Moura e da Lenda da Santa Compaña.

Tamén fan unha interpretación moi interesante da Santa Compaña.

O último grupo interesouse polos Planetas.

Durante a vídeo, explícannos o misteriosos e fascinantes que son os Planetas.

PERCORRENDO A BIBLIOTECA NACIONAL

Neste mes de decembro, a nosa Biblioteca Nacional cumple 300 anos. 

Foi fundada en 1711 por Felipe V. E, para celebrar esta data tan sinalada, estase a preparar unha exposición que comezará o día 14 de decembro.

Sabedes que se fai na Biblioteca Nacional...? Efectivamente, é o lugar onde se almacenan exemplares de todos os libros e documentos que se publican no noso país. Nela se conservan auténticas alfaias do noso patrimonio literario e cultural. Pero non só iso: ademais, ese patrimonio hai que restauralo, dixitalizalo (para preservalo) e difundilo.

Neste vídeo, os propios traballadores da Biblioteca Nacional nos explican como e en que traballan. Agradecemos a Asun Arufe, do CPI Viaño Pequeno, que nolo dera a coñecer.

3 de decembro: DÍA INTERNACIONAL DAS PERSOAS CON DISCAPACIDADE

Cando os xordos tamén poden facer música.

O Día Internacional das Persoas con Discapacidade ten como finalidade axudar a entender a discapacidade, promover os dereitos das persoas que a padecen e dar a coñecer os beneficios que se derivarían da integración destas persoas na vida social, política e cultural das súas comunidades.

Esta xornada mundial foi aprobada no ano 1982 pola Asamblea da ONU. O lema deste ano é: Xuntos en pro dun mundo mellor para todos, que comprenda a participación das persoas con discapacidade no desenvolvemento. 


E... que mellor forma de integrar ós xordos que dándolles participación nun concerto...?

Deixamosvos con este video gravado no Auditorio Nacional de Música de Madrid o 13 de xuño de 2010. Un concerto titulado Voces para la Paz 2010, dirixido por Miguel Roa, e no que colaborou o Coro Xestual do Instituto Ponce de León de Madrid. Cantan unha peza ben coñecida por todos: Alma llanera, de Elías Gutiérrez.

Por outra banda, no ITE (Instituto de Tecnoloxías Educativas) atopamos diferentes recursos para tratar o tema da discapacidade que podedes consultar neste enlace.


Disfrutade e integrade.

OS NENOS DE INFANTIL ANÍMANNOS A "REDUCIR O CONSUMO DA LUZ"

Os nenos e nenas de 4 anos B atoparon unha nova moi interesante no xornal: Na rúa Aragón van facer un plan experimental para aproveitar auga da chuvia e dun riachuelo subterráneo e así producir luz.

A partir desta nova estivemos buscando información sobre como axudar á terra para non esgotar os seus recursos, e aprendimos que hai que reducir o consumo de luz. Tamén creamos o noso noticieiro ecolóxico.

Para comprobar todo isto, convertímonos en vixiantes do cole, e todos os días, antes de saír ao patio, temos que apagar as luces. Tamén temos que vixiar na casa o consumo excesivo da corrente, para ir reducíndoo.

Grazas, nenos e nenas de 4 anos, por querer axudar á Terra!!!

TRABALLANDO O OLFACTO

O mércores de conto desta semana estivo connosco Montse Vázquez, a nai de Sabela e Silvia. Contou a historia de Garavanciño moi, pero que moi ben contada.

Despois fixo un obradoiro de arrecendos de plantas aromáticas e de máis cousas. Para rematar, xogamos a un bingo de recoñecer plantas e outras substancias polo seu olor. Non foi tan doado. Paréceme que temos unha asignatura pendente: traballar un pouco máis o sentido do olfacto... Só houbo unha gañadora.!!!!!!!!

Montse agasallounos con plantas aromáticas para sementar.

Grazas Montse, foi unha tarde moi divertida.!!!!!!

FESTA NAS BIBLIOTECAS ESCOLARES

A mañá, hoxe, comezou dun xeito inesperado e estupendo...

... Porque, ó abrir o correo electrónico, atopamos unha mensaxe das nosas asesoras de bibliotecas escolares (Cristina e Pilar) comunicándonos a marabillosa nova de que seis das nosas bibliotecas recibiran un Premio Nacional de Boas Prácticas:

• Modalidade A (EEI, CEIP, CEE e EPA):
• 1º premio: CEIP  A Lama (Pontevedra)
• 2º premio: CEIP Condesa de Fenosa - O Barco (Ourense)
• 3º premio: CRA de Ribadumia (Pontevedra)
• 3º premio: CEP Xosé María Brea Segade de Taragoña - Rianxo (A Coruña)

• Modalidade B (IES, FP, Ensinanzas artísticas e Escolas de Idiomas):
• 3º premio: IES de Celanova (Ourense)
• 3º premio: IES Alexandre Bóveda de Vigo (Pontevedra)

Como sabemos o moito traballo silencioso que se agacha detrás destes premios, as moitas horas de adicación, as ledicias, e, tamén, ás veces, os sinsabores, só queremos dicirvos... PARABÉNS! ESTAMOS TODOS MOI LEDOS!

E, de xeito moi especial, queremos felicitar a Beni (o noso veciño do IES Alexandre Bóveda) e a Rafa e Cristina, do CEIP A Lama, que, hai un par de anos, estiveron visitando a nosa Biblioteca.

E, para rematar, presentámosvos a Leo, a mascota da biblioteca escolar do CEIP A Lama. Se premedes nel, poderedes gozar do seu blogue e comprobar que, ese primeiro premio, é máis que merecido.