NO BLOG DE BIBLIOTECAS ESCOLARES

Falando sobre os kamishibais. 

O blog de Bibliotecas Escolares presenta un artigo cos resultados dunha investigación realizada entre varias bibliotecas de centros galegos ubicados na zona rural. Para ilustrar o artigo, inclúese o vídeo dos nenos e nenas de 1º B do noso cole, no que contan ós de 4º B a Historia do Rainbow Warrior.

http://www.edu.xunta.es/biblioteca/blog/?q=node/685

Nós xa temos experimentado que o kamishibai é un recurso estupendo no que atinxe ó Fomento da Lectura. Tamén sabemos que é sumamente útil para mostrar o resultado dun traballo de investigación. E que é moi axeitado para traballar a diversidade e impulsar o traballo cooperativo. 

No artigo poderedes descubrir máis bondades do kamishibai. E... por que non? Decidirvos a dárlle uso! Seguro que tamén resulta un gran recurso para unha tarde invernal e familiar!

Imaxe: Kim Traynor. Toy theater (c.1845-50), Edinburgh Museum of Childhood. En Wikipedia. CC BY SA. 

O QUE LLES PASOU ÓS PAIS DE MATILDA

Nos clubes de lectura de 6º curso, tras a lectura de Matilda, xurdira a pregunta: e que pasaría cos pais de Matilda?

Ariadna e máis Sara (6º A) botaron axiña a voar a imaxinación e dérannos a súa opinión. Pero un trasno que habita na nosa Biblioteca agachou os papeis, e... non os temos atopado ata hoxe!

Aquí está o seu conto. En primicia.

Nada máis chegar a España, o pai de Matilda foi comprar un televisor; a nai foi xogar ao bingo, e o irmán foi ver un partido de fútbol. 

Por se fora pouco, a nai gañou ao bingo, así que decidiron volver a Inglaterra e pagar a fianza. 

Cando Matilda saíu do colexio, atopouse cos seus pais, e foi de inmediato a avisar á señorita Honey. Ela advertíulle que non se acercara aos seus pais, pero eles raptárona, xa que, uns días antes, a tele explotara e só Matilda sabía arranxala. 

A señorita Honey empezou a buscala por todas partes. Cando chegou á casa dos pais de Matilda, a señorita Honey atopou á nai de Matilda cun iogur na orella, pensando que ía escoitar algo. Tamén estaba Matilda, mirando á nai fixamente, e entón... KATAPUUUM!!! A nai explotou. 

Entón, Matilda deu un chimpo na cama. 

- Menos mal, foi todo un sono. 

EMULANDO Á IRMÁ MAIOR

Xorxe tamén escribe, como Alexandra.

Se onte vos mostrabamos o conto de Alexandra, hoxe tócalle a vez ó seu irmán Xorxe. Vese que o que máis lle tira é o álbum ilustrado. Aquí tendes a súa versión do famoso A que sabe a lúa:

E aquí, a súa creación: El viaje al espacio:

Como vedes, o rapaz, como a súa irmá, tamén "apunta mañas".

Parabéns, Xorxe... e familia!

Imaxe: Universo 123. En Wikimedia Commons. CC BY SA.

AS POESÍAS QUE VIAXAN POLAS ESTACIÓNS

Ou como escribir poesía tan só con 7 anos.

A nosa alumna Alexandra xa ten unha grande experiencia como escritora. Este curso sorprendeunos con este libro ó que, como vedes, non lle falta de nada. Incluída editorial.

Grazas, Alexandra! Xa estamos esperando un novo conto!

Imaxe de dominio público en Pixabay

"A LINGUA SABE A PAN", EN EDUGA

Case coincidindo coa entrega dos Premios Nacionais.

Ven de publicarse o novo número da revista Eduga, e, nel aparece un artigo sobre o nodo PDI do curso pasado (A lingua sabe a pan).

Nesta revista podemos atopar interesantes experiencias que, sen dúbida, contribuirán a ampliar os nosos horizontes.

O artigo sobre o noso PDI atoparédelo neste enlace.

NAVEGANTES QUE NAVEGADES

A resposta á última pregunta do Concurso A voltas coa lingua. 

Cun pouco de retraso, contestamos á nosa cuarta (e última cuestión, por este curso) do noso concurso.

Para refrescar as preguntas, podedes acceder a este enlace.

As respostas correctas son:

1. Canoa
2. Góndola e crebaxeos
3. Dorna e gamela
4. Palangreiro
5. Traiñeira
6. Corveta
7. Planadora
8. Góndola
9. Crebaxeos

Esta vez era ben doado... por iso só consideramos as respostas totalmente correctas. E os vencedores foron: 

• Gael Alonso (6º A)
• Andrés López (6º A)

Pois... grazas por participar!

E a disfrutar do verán e seguir navegando...!